ЛДП: Со вакви политики утре нема да има кој да ги води институциите! Партиските книшки не можат да го заменат знаењето

Либерално-демократската партија (ЛДП) преку соопштение предупредува дека партизацијата на институциите, недоволните вложувања во науката и одливот на млади кадри може да доведат до недостиг на стручни луѓе што ќе ги водат клучните институции во Македонија.

— реклама —

Од партијата посочуваат дека, и покрај зголемувањето на буџетот за наука од 380 милиони денари во 2024 година, на 680 милиони во 2025 и 773 милиони денари во 2026 година, земјата сè уште е далеку од европските стандарди. Според ЛДП, Европската комисија во извештајот за 2025 година предупредува дека вложувањата во истражување и иновации остануваат многу ниски, а учеството на приватниот сектор е маргинално.

— реклама —

Партијата ја посочува и состојбата во образованието, повикувајќи се на резултатите од ПИСА-тестирањето. Според наведените податоци, само околу 35 отсто од 15-годишните ученици во Македонија го достигнуваат основното ниво на знаење по природни науки, наспроти 76 отсто во земјите на ОЕЦД.

ЛДП наведува и дека Македонија во 2021 година вложувала 0,38 отсто од бруто-домашниот производ во истражување и развој, додека Словенија во 2023 година издвојувала 2,13 отсто. Од партијата нагласуваат дека, иако податоците се од различни години, разликата укажува на големиот развоен јаз.

— реклама —

ЛДП бара Владата да изработи конкретен план за достигнување на европските стандарди во науката и образованието, со поголеми и предвидливи вложувања, модерни лаборатории, поддршка за младите истражувачи и подобра соработка меѓу универзитетите и стопанството. Партијата бара и департизација на институциите, како и јавен отчет за тоа колку од најавените средства навистина се вложени во научни проекти и какви резултати се постигнати.

„Без наука нема развој. Без стручни луѓе нема функционални институции. А без младите нема иднина за Македонија“, порачуваат од ЛДП.