ЛДП: Хаос, пиши-бриши и институционално лудило - добиваме нови шлаканици од ЕУ додека власта секој ден ги менува законите зад грбот на народот!

Либерално-демократската партија (ЛДП) преку соопштение реагира на последните измени на законите во Собранието, обвинувајќи ја власта за непредвидливи законски интервенции и нарушување на правната сигурност. Од партијата велат дека владејачкото мнозинство прво избришало одредени одредби, а потоа по итна постапка повторно се вратило на нивно менување.

— реклама —

Од ЛДП оценуваат дека ваквиот начин на носење закони создава правна неизвесност и негативно влијае врз довербата во институциите, но и врз инвестициската клима. Во својата реакција се повикуваат на последниот извештај на Европската комисија, во кој, според партијата, се укажува на распространетоста на високата корупција и проблемите што ги предизвикуваат честите и непредвидливи законски измени.

— реклама —

Претседателката на ЛДП и пратеничка во Собранието, Моника Зајкова, оцени дека честите измени на Кривичниот законик по скратена постапка ја нарушуваат правната сигурност и создаваат нееднаков третман меѓу функционерите и граѓаните.

„Ова е врв на неспособноста и ќе речам ‘правно дивјаштво’ кое мора да престане веднаш! Прво си изгласаа амнестија за функционерите за да ја заштитат високата корупција, а сега со секојдневните измени во Кривичниот законик по скратена постапка прават хаос, додека за обичниот граѓанин воведуваат ригорозни казни“, порача Зајкова.

— реклама —

Таа ја обвини власта дека со ваквите постапки ја изложува Македонија на критики од Европската Унија и предупреди дека честите законски промени ја поткопуваат довербата во правната држава.

— реклама —

ЛДП бара запирање на, како што го нарекува, хаотичното менување на законите, повлекување на досегашните спорни интервенции и воспоставување поефикасен систем на владеење на правото.