Зајкова објави петиција за воведување електронски нараквици за следење на насилниците

На барање на граѓаните е покрената петиција со која се бара итно воведување електронски нараквици за следење на сторителите на семејно насилство, соопшти претседателката на ЛДП и пратеничката Моника Зајкова. Целта е да се соберат 10.000 потписи за распишување референдум за воведување на оваа мерка.

— реклама —

Предвидено е нараквицата да ја предупредува жртвата и да ги известува надлежните институции кога сторителот ќе се приближи поблиску од законски утврденото растојание.

— реклама —

ЛДП во изминатата година двапати поднела предлог за измени на Законот за спречување и заштита од насилство врз жените и семејното насилство, но двата предлога биле одбиени од собраниското мнозинство. Последниот предлог, поднесен од Зајкова во март годинава, не добил доволна поддршка – од 97 присутни пратеници, 27 гласале „за“.

— реклама —

Во меѓувреме, претседателката Гордана Сиљановска-Давкова на 5 март оцени дека институционалната превенција доживеала пораз, посочувајќи дека во првите два месеца од 2026 година биле регистрирани четири случаи на фемицид. Според податоците што ги изнела, во текот на 2025 година биле пријавени 4.745 случаи на семејно насилство и шест убиства.

— реклама —

Паралелно, граѓанската иницијатива „Ниту една повеќе!“ организира протестен марш во Скопје против фемицидите, институционалното насилство и неказнивоста. Повод за протестот е убиството на 17-годишната Билјана Ќириќ од Богданци. Од иницијативата наведуваат дека девојката претходно пријавувала насилство и закани по живот, а биле изречени и мерки за заштита.