Зајкова: Границите ни се швајцарско сирење, секој влегува и излегува кога сака

Претседателката на Либерално-демократската партија (ЛДП), Моника Зајкова, предупреди дека Македонија се соочува со сериозни безбедносни ризици поради слабостите во законодавството, недоволната контрола на границите и ширењето пропаганда и говор на омраза. Таа ги повика сите парламентарни партии заеднички да работат на законски измени со кои, според неа, ќе се спречат надворешни влијанија и можни обиди за дестабилизација.

Во гостувањето во емисијата „Колегиум“, Зајкова оцени дека политичката дебата премногу се фокусира на односите со Бугарија и надворешните блокади, додека домашните институционални и законски слабости остануваат нерешени.

— реклама —

„Премногу се фокусираме само на тоа дали некој однадвор нè сака, додека клучниот проблем лежи во нашите сопствени домашни пропусти и слаба легислатива. Не може да ја обвинуваме Европската Унија кога кај нас границите ни се 'швајцарско сирење' и секој излегува и влегува кога сака“, изјави Зајкова.

Според неа, недоволно прецизните закони оставаат простор за злоупотреби, ширење странски пропаганди, дејствување на спорни клубови и други влијанија што би можеле да предизвикаат општествени и безбедносни тензии.

— реклама —

Зајкова смета дека Македонија треба да воспостави сопствени правни механизми за заштита, по примерот на Европската Унија, која применува заштитни инструменти во односите со меѓународните партнери.

— реклама —

Таа посебно предупреди на ширењето хибридна пропаганда, активностите на ботови на социјалните мрежи и говорот на омраза, оценувајќи дека државата мора да има поефикасни механизми за справување со ваквите појави.

„Јас отворено и јавно во емисијата подавам рака – да седнеме сите парламентарни партии заедно и да ги затвориме сите дупки во нашето домашно право преку кои утре можеме да бидеме подложни на туѓи апетити и пропаганди. Мораме да се заштитиме и да изградиме закони што ја чуваат државата“, порача претседателката на ЛДП.

Од партијата побараа власта и останатите парламентарни субјекти без одлагање да започнат процес за зајакнување на законската рамка, особено во областите на граничната контрола, безбедноста и заштитата од надворешни влијанија.

Според ЛДП, овие прашања треба да се решаваат преку меѓупартиски дијалог, независно од дневнополитичките несогласувања.