Зајкова: „Жена Феникс“ е симбол на илјадници жени кои се борат, создаваат и се издигнуваат

Со порака дека секоја жена заслужува достоинство, слобода и еднакви можности, во Општина Центар беше промовиран муралот „Жена Феникс“, по повод одбележувањето на 50-годишнината од постоењето на општината.

— реклама —

На промоцијата присуствуваше претседателката на ЛДП и пратеничка во Собранието, Моника Зајкова, која истакна дека муралот ја претставува приказната за илјадници жени кои секојдневно работат, создаваат, се грижат за своите семејства и се соочуваат со различни предизвици.

Таа посочи дека зад симболиката на жената Феникс стојат и приказните на жените кои преживуваат страв, закани и насилство, но не се откажуваат од надежта за слободен живот.

— реклама —

„Жената не треба прво да изгори за општеството да ја препознае нејзината сила! Овој мурал нека биде потсетник дека зад секоја жена стои приказна што заслужува почит, достоинство и еднакви можности“, порача Зајкова.

— реклама —

Таа нагласи дека задачата на општеството не е само да им се восхитува на жените кои успеале повторно да се издигнат, туку да создаде услови во кои ниту една жена нема да мора сама да се соочува со насилство и неправда.

Муралот „Жена Феникс“ е авторско дело на Драган Китановски-Драш, Миро Грчев-Микс и Марјан Димиќ-Мачка. Преку симболиката на митолошката птица која повторно се раѓа од пепелта, делото ја претставува женската сила, истрајност и надеж.

— реклама —

„На жените не им требаат само крилја за повторно да полетаат. Нив им треба слобода, сигурност и држава што ќе ги заштити“, заклучи Зајкова.