Се бара инспекциски контроли во училиштата по ново сведоштво за врсничко насилство

Либерално-демократската младина (ЛИДЕМ) побара итна реакција од надлежните институции по потресното сведоштво на мајка за врсничкото насилство што го преживеало нејзиното дете во училиште. Од организацијата предупредуваат дека насилството меѓу учениците не смее да се третира како детска игра или минлива фаза, а институциите мора да обезбедат конкретна заштита за жртвите.

Од ЛИДЕМ потсетуваат дека пред неколку години ја започнале кампањата „Свирни против булинг“, преку која барале превенција, едукација и навремено постапување на институциите. Сепак, според нив, апелите не наишле на соодветен одговор.

— реклама —

„Свиревме против булингот, но институциите останаа глуви! Уште колку деца треба да страдаат за некој да реагира?“, прашуваат од ЛИДЕМ.

Организацијата посочува дека сведоштвата за физичко и психичко насилство, понижување и малтретирање меѓу учениците повторно го отвораат прашањето за одговорноста на училиштата и надлежните институции.

— реклама —

„Нема оправдување за насилството! Нема оправдување за премолчувањето! И нема простор за уште една празна институционална изјава дека ‘се работи на случајот’“, се наведува во реакцијата.

ЛИДЕМ бара надлежните итно да го испитаат пријавениот случај и да обезбедат заштита на детето. Воедно, повикува Министерството за образование и Државниот просветен инспекторат да извршат контрола на постапувањето по пријавите за врсничко насилство.

Меѓу барањата се и воспоставување јасни и доверливи механизми за пријавување насилство во секое училиште, обезбедување психолошка поддршка за жртвите и спроведување системска превенција со учество на родителите, наставниците и учениците.

— реклама —

Од организацијата инсистираат институциите јавно да ги соопштат преземените мерки и роковите за нивно спроведување, притоа целосно почитувајќи ја приватноста на децата.

„Не бараме одмазда меѓу деца. Бараме одговорност од возрасните и институциите што се должни да ги заштитат“, порачуваат од ЛИДЕМ.

Тие оценуваат дека кампањите и протоколите немаат ефект доколку не се применуваат во практика и доколку институциите реагираат дури откако некое дете ќе претрпи насилство.

„Ниту едно дете не смее да се плаши да оди на училиште. Пред години свиревме за да го спречиме насилството. Денес прашуваме: Дали некој воопшто нè слушаше?“, се наведува во соопштението на ЛИДЕМ.