Зајкова: Борбата за отворени листи не е предавство, туку слобода за граѓаните – нема да бидеме декор во вашите партиски пресметки

Претседателката на Либерално-демократската партија (ЛДП), Моника Зајкова, порача дека партијата нема да се откаже од барањето за една изборна единица и отворени листи, нагласувајќи дека граѓаните треба да имаат право директно да ги избираат своите претставници.

— реклама —

Во гостувањето на ТВ Алфа, Зајкова истакна дека ЛДП е независна и идеолошки автентична партија која разговара со бизнис-секторот, невладините организации, граѓаните и политичките партии за создавање решенија што ќе го подобрат животниот стандард. Како пример го посочи укинувањето на банкарските провизии.

Таа нагласи дека партијата нема намера да се меша во внатрешните работи на другите партии, но смета дека разговорите за отворени листи и сојузништва за спроведување реформи се легитимни.

— реклама —

„Ако разговорот за отворени листи или лобирањето за сојузништво за да дојдеме до овие решенија за некого е најголем грев и предавство, нема проблем – нека бидеме ‘предавници’!“, порача Зајкова.

— реклама —

Според неа, отворените листи ќе го ограничат монополот на партиските лидери при изборот на кандидатите за пратеници и ќе им овозможат на граѓаните непосредно да одлучуваат за своите претставници.

Зајкова оцени и дека незадоволството расте кога институциите ги игнорираат реалните проблеми и кога нема правда. Таа порача дека ЛДП останува посветена на демократијата, отворените листи и владеењето на правото.

„На Македонија не ѝ требаат партиски монополи и затворени касти, туку слободни граѓани кои сами си ја кројат иднината“, порача претседателката на ЛДП.