На денешен ден, 16 јуни 1943 година, во месноста Моклиште кај Ваташа беше извршен Ваташкиот масакр – едно од најтешките злосторства врз цивилното население во Македонија за време на Втората светска војна.
Во рамките на Јунската непријателска офанзива, со цел да го задуши народноослободителното движење, бугарскиот фашистички окупатор стрелаше 12 младинци од Ваташа, на возраст од само 15 до 27 години. Претходно, тие биле приведени, испрашувани и малтретирани под сомнение дека им помагале на партизанските одреди.
Утрото на 16 јуни селото било блокирано од војска и полиција. Младинците биле одведени во месноста Моклиште, каде што девојките биле издвоени, а врз момчињата бил отворен оган од митралези и пушки. Според сведоштва и записи од тогашниот Главен штаб на НОВ и ПОМ, телата на жртвите биле дополнително обезличени со бајонети.
По завршувањето на војната, главните организатори и извршители на злосторството биле изведени пред суд и осудени. Во чест на 12-те стрелани младинци, во Ваташа е изградена спомен-костурница, а на местото на стрелањето е подигнат спомен-парк со 12 јавори – симбол на прерано згаснатите млади животи.
Ваташкиот масакр останува траен потсетник на страдањата во војната и на цената што ја плати македонскиот народ во борбата против фашизмот. Сеќавањето на ваташките младинци продолжува да живее како опомена никогаш да не се заборават жртвите и ужасите на минатото.
