Автократот Џафери не е достоен за претседател на Собрание, очекуваме Ковачевски и СДСМ да ја поддржат интерпелацијата, вели ВМРО-ДПМНЕ
Автократот од Форино, Талат Џафери не е достоен да го води законодавниот дом. Тој во клучната демократска институција со своето самоволие ги лиши пратениците од слободно движење, да им заклучува врати и да ги држи како заложници, вели ВМРО-ДПМНЕ
„Тој со ова свое дејствие стори кривично дело од чл. 140 ст.3 и 4 од КЗ, од кои ст.3 гласи дека и обидот се казнува. Додека ст.4 вели дека ако противправното лишување од слобода го стори службено лице со злоупотреба на службената положба или овластување, ќе се казни со затвор од шест месеци до пет години.
Да потсетиме дека Џафери во рок од десетина дена влегува од скандал во скандал. На заклучувањето на пратениците му престоеше пцуење, навредување и дерење кон службениците во собранието, но и скандалот со средбата со чеченски политичар кој што е близок со режимот во Кремљ, кој е директен ризик по безбедноста. За сето ова Џафери ниту се извинува, ниту има намера да поднесе оставка.
Да има грам совест Џафери ќе си поднесеше оставка. Бидејќи нема, пратеничката група на ВМРО-ДПМНЕ ќе поднесат Интерпелација на претседателот на Собранието Талат Џафери. Очекуваме конечно Димитар Ковачевски и СДСМ да излезат од заложништвото на ДУИ и да ја поддржат интерпелацијата. Во спротивно ќе покажат дека поважни им се фотелјите од демократијата и личната кариера кои им зависат од ДУИ“, се вели во соопштението.
