Бајден го искритикува пристапот на Нетанјаху кон војната во Газа
![Бајден: Да не беше Трамп, веројатно немаше да се кандидирам за уште еден мандат](https://skopje1.mk/wp-content/uploads/2023/12/Бајден-Да-не-беше-Трамп-веројатно-немаше-да-се-кандидирам.jpg)
Пристапот на израелскиот премиер Бенјамин Нетанјаху кон војната во Газа е „погрешен“, изјави американскиот претседател Џозеф Бајден.
„Мислам дека тоа што го прави е погрешно. Не се согласувам со неговиот пристап“, рече Бајден во интервју за Univision, американската ТВ мрежа на шпански јазик што се емитуваше во вторник.
Тој апелираше до израелските власти „само да повикаат“ на прекин на огнот во траење од шест до осум недели и да овозможат целосен пристап до хуманитарната помош наменета за населението во Газа зафатена од војна.
Бајден, исто така, рече дека во разговорите со лидерите на земјите од регионот „од Саудијците до Јорданците до Египќаните“, добил уверување дека тие се подготвени да почнат да доставуваат помош и дека е неопходно „да го направат тоа сега“.
Американскиот претседател, исто така, претходно го нарече израелското бомбардирање на Газа „недискриминирачко“, а неговите воени дејствија „претерани“.
Белата куќа минатата недела објави дека Бајден, во разговор со Нетанјаху, се заканил дека американската поддршка за израелската офанзива ќе ја условува со преземање конкретни чекори за заштита на хуманитарните работници и цивилите.
Тој повик следуваше по израелскиот воздушен напад во кој беа убиени седуммина хуманитарни работници на организацијата Светска централна кујна.
![](https://skopje1.mk/wp-content/uploads/2022/01/2222.png)