Зависниците од дроги кои треба да се лекуваат во поликлиниката Јане Сандански, не се добредојдени за локалните жители. Тие денес на протест побараа министерот Филипче да ја поништи одлуката, бидејќи како што велат, во близина има улилишта и градинки, па стравуваат дека нивните деца можат да бидат нападнати.
„Овој протест е револт по одлуката на министерот Филипче тука да се лечат зависници од дрога. Мислим дека моите деца можат да бидат нападнати од зависници, бидејќи сум видела како се лечат, а притоа, бараат пари. Нека се отворат посебни места каде ќе примаат терапија. На пример во Драчево или Лисиче. Таму нека се лечат, таму каде нема многу население. Три простории можат да се напраат за три месеци“, вели Оливера Стефановска, жителка на Аеродром.
На протестот беше и ексградоначалникот Ивица Коневски кој ги поддржа протестите. Тој вели дека масовноста ќе се зголемува.
„Сметаме дека одлуката е скандалозна бидејќи објективно проблемот на Кисела Вода ќе биде решен, но ќе биде префрлен на други три места. Тоа секојдневие кое го има во Кисела Вода ќе се префрли тука. Бараме одлуката да се повлече. Решението треба да го најде Филипче. Масовноста ќе се зголемува од ден на ден ако одлуката не се промени. Нема расположение ниту зависниците привремено да останат тука“, рече поранешниот градоначалник на Аеродром, Ивица Коневски, кој беше присутен на протестот.
