Адвокатот Владимир Туфегџиќ оцени дека процесот за избор на судија во Европскиот суд за човекови права продолжува со зголемени тензии и нервоза и дека последната јавна конфронтација дополнително го нарушува впечатокот за правичност и непристрасност на постапката.
Тој потсетува дека првиот оглас бил поништен, а кандидатите, според него, не добиле образложение зошто не ги исполнуваат условите.
„Агонијата со изборот на судија во европскиот суд за човековите права продолжува со зголемена доза на тензии и нервоза“, пишува Туфегџиќ.
Според него, јавната конфронтација во вториот оглас не е добра ниту за Комисијата ниту за државата, а особено проблематичен го смета нервозниот пристап во комуникацијата.
Туфегџиќ наведува дека не е упатно кандидат во текот на изборната постапка јавно да изнесува мислења, бидејќи тоа може да се смета за отстапување од строгите стандарди на професионално однесување.
Но, истовремено, според него, не е прифатливо ниту Комисијата јавно да влегува во конфронтација и да изнесува оформено негативно мислење и непријателски став кон кандидатот.
„Според моето мислење, кандидатот има успешна мисија, ако тоа му било целта, во насока на дискредитација на правичноста и непристрасноста на целиот процес, бидејќи предизвика јавна конфронтација и непријателски став од тој што треба да биде непристрасен и објективен“, оценува Туфегџиќ.
Тој смета дека ваквиот развој на настаните може да остави сериозен впечаток и надвор од државата.
„Сигурен сум дека европските емисари го следат внимателно и овој дел од процесот и секако дека ќе го имаат предвид“, наведува адвокатот.
На крајот, Туфегџиќ го отвора и прашањето дали Комисијата треба да размисли за поништување на огласот и оставка.
„После сите случувања се поставува прашањето дали е време Комисијата да размисли да го поништи огласот и да поднесе оставка за да се заштити угледот и дигнитетот на изборниот процес. Сепак се бира судија во Стразбур“, пишува Туфегџиќ.=
