Агенцијата за храна и ветеринарство (АХВ) ги отфрла како неточни тврдењата дека јами за нештетно отстранување на угинати и евтаназирани овци и кози остануваат отворени со денови и дека кучиња разнесуваат животински трупови.
Од АХВ реагираат на изјавата на претседателот на Сојузот на одгледувачи на овци „Модерен овчар“, Насер Џемаили, дадена во селото Соколарци, општина Чешиново-Облешево. Од институцијата категорично тврдат дека јамата во близина на која е дадена изјавата не била оставена отворена по отстранувањето на животните.
Според АХВ, секоја јама што се користи за оваа намена веднаш се затрупува по ставањето на угинатите или евтаназираните животни, без исклучок. Истиот ден се врши и дезинфекција на јамата, како и на опремата и механизацијата употребени при постапката.
Од АХВ посочуваат дека евентуалните трупови на угинати животни што може да се најдат на терен би можеле да потекнуваат од несовесни сточари кои не ги пријавуваат угинувањата и ги оставаат животните на местото каде што угинале. Оттаму предупредуваат дека ваквото постапување претставува сериозен ризик за ширење на сипаници кај овците и козите.
Агенцијата апелира до сточарите веднаш да пријават доколку забележат клинички знаци што упатуваат на сомнеж за болеста. Пријавувањето треба да се направи до надлежното ветеринарно друштво или до официјален ветеринар на АХВ.
