Туристички излет на Бахамите завршил со тешки повреди за 37-годишна Австријка, која била нападната од ајкула додека учествувала во активност што вклучувала пливање со делфини.
Нападот се случил на околу 5,5 километри од брегот на островот Бимини, потврдила полицијата на Бахамите.
Жената се здобила со тешка повреда на десниот глужд. По нападот, кој се случил завчера, околу 17:30 часот, била пренесена во клиниката „Бимини комјунити“.
Поради сериозноста на повредите, 37-годишната Австријка набрзо била пренесена со авион на натамошно лекување на Њу Провиденс, главниот и најнаселен остров на Бахамите.
Полицијата на Бахамите отворила истрага за да се утврдат сите околности под кои дошло до нападот.
