Ако утре патувате на Халкидики, треба да знаете дека грчките власти воведуваат нови ограничувања поради зголемениот ризик од шумски пожари.
Мерките следуваат по големиот пожар што денеска избувна во Сивири, поради кој беа евакуирани жители и туристи. Од петок, 14 август, привремена забрана за движење на пешаци и возила ќе важи во одредени шумски подрачја во делови од Касандра и Ситонија, во периодот од 8 до 20 часот.
Во Аристотелис, каде што опасноста од пожари е оценета како многу висока, ограничувањето ќе биде во сила до 8 часот в сабота.
Мерките ги опфаќаат делови од Касандра и Ситонија, како и подрачјата меѓу Комица и Уранополис и во близина на Стратони.
Пристапот до шумските патишта ќе го контролира полицијата. На лицата кои ќе бидат затекнати во забранетите подрачја може да им биде наредено да ги напуштат, а за непочитување на мерките е предвидена глоба од 300 евра. Исклучок се волонтерите ангажирани во активности за превенција и гаснење пожари.
За македонските туристи кои веќе се на Халкидики или планираат да патуваат во следните денови, се препорачува внимателно да ги следат официјалните известувања и да ги почитуваат евентуалните наредби за евакуација.
