Нова анализа на снимки од мозокот дава нови сознанија за тоа како акупунктурата може да влијае врз симптомите на депресија. Истражувачите откриле дека третманот е поврзан со промени во одредени мозочни мрежи кои имаат важна улога во регулирањето на емоциите и системот за наградување.
Научници од Пекиншкиот универзитет за кинеска медицина анализирале седум претходни клинички испитувања со вкупно 357 пациенти со тешко депресивно нарушување. Снимките на мозокот на пациентите третирани со акупунктура биле споредени со оние на лица кои примале антидепресиви или плацебо.
Кај пациентите кои примале акупунктура била забележана зголемена активност во десниот цингуларен кортекс, кој учествува во контролата на емоциите, како и во десниот каудат, дел од мозокот поврзан со системот за наградување.
Поголем број третмани бил поврзан и со поизразени промени во левата амигдала, регион важен за обработката на емоциите.
За разлика од тоа, кај пациентите кои земале антидепресиви биле забележани промени во левиот хипокампус, кој има улога во меморијата и реакцијата на стрес, како и во десниот среден окципитален гирус, поврзан со визуелната обработка.
Истражувачите наведуваат дека резултатите укажуваат на можен различен механизам на дејство на акупунктурата во споредба со конвенционалните третмани. Според нив, промените во мозочните региони поврзани со емоциите и наградувањето би можеле да помогнат во намалувањето на симптоми како губењето интерес и задоволство и нарушувањата во емоционалната регулација.
Сепак, авторите нагласуваат дека резултатите се прелиминарни и дека се потребни поголеми и подолгорочни истражувања. Дополнително, методите на акупунктура се разликувале меѓу анализираните студии, па научниците сметаат дека е потребно нивно дополнително стандардизирање.
