Општина Касандра на Халкидики издаде предупредување до жителите и туристите да не ја користат водата од чешма за пиење, готвење и миење заби, откако во водоводната мрежа во Сивири била откриена микробиолошка контаминација.
Одлуката ќе остане во сила сè додека не бидат завршени сите потребни проверки и не се потврди дека водата повторно е безбедна за употреба.
Според локалните власти, микробиолошката контаминација била утврдена при анализа на примерок од вода, спроведена од Дирекцијата за јавно здравје и социјална заштита на Регионалната единица Халкидики. Надлежните предупредуваат дека откриените микроорганизми можат да претставуваат ризик за јавното здравје.
Општина Касандра им препорачува на жителите и посетителите да користат флаширана или соодветно превриена вода до ново известување.
Во меѓувреме, надлежните потсетуваат дека квалитетот на водата за пиење во Грција не е ист во сите региони. Во големите градови, како Атина и Солун, водата од чешма вообичаено се смета за безбедна за пиење, готвење и миење заби.
Од друга страна, на дел од грчките острови и во помалите туристички места, квалитетот на водата може да варира поради локалните водоводни системи, состојбата на инфраструктурата или користењето постројки за десалинизација.
Експертите советуваат туристите секогаш да ги следат препораките на локалните власти и на сместувачките капацитети. Доколку има каков било сомнеж во исправноста на водата, најбезбедно е да се користи флаширана вода, особено за деца, постари лица и лица со чувствителен дигестивен систем.
