На Граничен премин Табановце била извршена една од најголемите заплени на девизи досега, откако царинските службеници откриле околу половина милион евра скриени во специјално изработен бункер во минибус.
Директорот на Царинска управа, Бобан Николовски, информираше дека сомнителните преправки на возилото биле откриени со помош на скенер, по што бил пронајден скриениот простор со девизите.
Според него, девизите и минибусот се трајно одземени, а сторителот е државјанин на Албанија. За случајот веќе е донесена судска пресуда од Основен суд Куманово.
Минибусот бил сопственост на туристичка агенција од Албанија, а во моментот на контролата во него се превезувале седум патници.
