(Видео) На Богородица запленети 77 парчиња златен накит вредни четири милиони денари, скриени во перница за врат во автобус од Истанбул

Царинските службеници на граничниот премин Богородица заплениле 77 парчиња златен накит вредни околу четири милиони денари, кои тетовчанец, сопственик на златарница, се обидел нелегално да ги внесе во државата, скриени во перница за врат.

— реклама —

Случајот бил откриен при контрола на автобус што сообраќал на релацијата Истанбул – Гостивар. Иако патниците биле прашани дали имаат стока за пријавување, никој не пријавил ништо, по што царинските службеници извршиле детален преглед.

Во внатрешноста на перницата за врат што ја носел осомничениот биле пронајдени 77 парчиња златен накит со вкупна тежина од 612 грама.

— реклама —

Од Царинската управа информираат дека во предистражната постапка биле обезбедени докази оти тетовчанецот го купил накитот од златарска работилница во Истанбул, а потоа планирал нелегално да го внесе во државата и да го продава во сопствената златарница.

— реклама —

Против него е поднесена кривична пријава за криумчарење, дело казниво согласно со Кривичниот законик.

Од Царинската управа посочуваат дека продолжуваат со активностите за заштита на финансиските интереси на државата и создавање услови за фер економија.

View this post on Instagram