Хашиш, амфетамин и МДМА пронајдени кај германски државјанин на Табановце

Царинските службеници на граничниот премин Табановце откриле и заплениле повеќе видови дрога кај германски државјанин кој влегувал во државата со својот сопружник. При контролата биле пронајдени хашиш, амфетамин, МДМА и тетрахидроканабинол, а случајот е документиран и со снимки од боди-камерите на службениците.

— реклама —

Според информациите од Царинската управа, откако возилото било избрано за проверка, службениците пронашле супстанца со зеленкаста боја во црна кесичка, жолта восочна материја во црни кутивчиња, како и дрога во форма на бонбони. Биле откриени и дробилки и вага за прецизно мерење.

— реклама —

При личниот претрес на осомничениот биле пронајдени дополнителни количества супстанци со зеленкаста боја, бела прашкаста материја, бел гел и таблети со портокалова и кафеава боја.

Лицето било приведено од инспектори од Одделението за истраги, по што биле преземени предистражни дејствија. По наредба на јавен обвинител било извршено вештачење, со кое бил утврден составот на пронајдените супстанци.

— реклама —

Против осомничениот е поднесена кривична пријава до Основното јавно обвинителство Куманово за неовластено производство и пуштање во промет на наркотични дроги, психотропни супстанци и прекурсори.

— реклама —

Од Царинската управа наведуваат дека случајот е документиран со снимки од боди-камери што биле обезбедени како донација од Министерството за правда на САД.