Алијансата за Албанците со критики до Владата: Не ја жртвувајте иднината на граѓаните за партиски интереси

Алијансата за Албанците упати порака до Владата и премиерот Христијан Мицкоски, барајќи усвојување на уставните измени и деблокирање на европскиот пат. Од партијата велат дека обврските преземени во 2022 година треба да се исполнат и предупредуваат дека одолговлекувањето на процесот има последици врз сите граѓани.

„Ние, Албанците, отсекогаш сме ги почитувале и поддржувале идентитетот, јазикот и достоинството на нашите сограѓани Македонци, дури и кога таа почит не била взаемна. Никогаш не сме го оспорувале нивниот идентитет, додека ние самите и понатаму сме дефинирани во Уставот со понижувачката формулација од 20 проценти“, се наведува во соопштението на Алијансата за Албанците.

— реклама —

Од партијата посочуваат дека Албанците сочинуваат речиси една третина од населението и нагласуваат дека нема да прифатат да бидат заложници на политички калкулации.

— реклама —

„Договорот е договор! Обврските од 2022 година мора да се исполнат, без разлика дали тоа му се допаѓа на Мицкоски или не. Стравот од хипотетички услови од страна на Бугарија не може да служи како оправдување за блокирање на европската иднина“, велат од Алијансата.

Според партијата, Мицкоски бил во поповолна позиција во 2024 година отколку во 2026 година, а доколку продолжи со сегашната политика, во 2028 година би можел да биде во уште послаба позиција. Тие предупредуваат дека колку подолго се одложува процесот, толку поголема е цената што ја плаќаат граѓаните, без оглед на етничката припадност.

— реклама —

„Младите си заминуваат, семејствата се иселуваат, а политиката продолжува да купува време. Груевски ни изгуби една деценија. Албанците нема да чекаат уште една деценија за Мицкоски! Вие сте Влада, имате мандат и одговорност. Проголтајте го овој залак, усвојте ги уставните измени и отворете го европскиот пат“, се наведува во соопштението.

Од Алијансата додаваат дека доколку во иднина се појават нови пречки, тогаш ќе треба да се бараат решенија, но дека трпението не е бесконечно. Партијата порачува дека го поддржува европскиот пат, но нема да поддржува политики што, како што велат, ја жртвуваат иднината на граѓаните за партиски интереси.

„Не нè принудувајте нас, Албанците, да ве оставиме сами во вашата политичка блокада. Тоа не би бил добар пат за никого. Доста е со изговори! Време е за одлуки денес, а не во 2028 година!“, порачуваат од Алијансата за Албанците.