Сè поголем број Американци сметаат дека државата треба да воведе построги правила за работата на социјалните мрежи, особено кога станува збор за заштитата на децата и младите. Тоа го покажува најновата анкета на „Ројтерс“ и „Ипсос“, според која речиси две третини од граѓаните поддржуваат поголем државен надзор врз дигиталните платформи.
Истражувањето, спроведено меѓу 4.505 полнолетни лица во САД, покажува дека 85 отсто од испитаниците сметаат оти социјалните мрежи создаваат зависност кај најмладите, а ист процент оценува дека тие имаат негативно влијание врз менталното здравје на децата и младите.
Поддршката за построга регулација е висока меѓу гласачите на двете најголеми американски партии. За поголем државен надзор се изјасниле 71 отсто од демократите и 62 отсто од републиканците.
Особено голема поддршка има идејата за задолжителна проверка на возраста на корисниците помлади од 16 години. Таквата мерка ја поддржуваат 66 отсто од анкетираните, при што поголема поддршка има меѓу републиканците – 74 отсто, наспроти 69 отсто кај демократите.
Граѓаните сè почесто сметаат дека само родителската контрола не е доволна за заштита на децата од негативните последици на социјалните мрежи, поради што бараат поголема улога на државата.
Резултатите од анкетата доаѓаат во период кога големите технолошки компании се соочуваат со зголемен правен и политички притисок. Во американската сојузна држава Ново Мексико, судот веќе ѝ наложи на Мета да плати 567 милиони долари во фонд за ментално здравје на тинејџерите и да ги промени начинот и механизмите на функционирање на своите платформи.
Во меѓувреме, повеќе американски сојузни држави усвојуваат сопствени правила за заштита на малолетниците на интернет. Технолошкото лоби, предводено од организацијата „Нетчоис“, поднесе тужби против дел од овие мерки, тврдејќи дека задолжителната проверка на возраста ја нарушува уставната заштита на слободата на говорот.
Мета истовремено се соочува со можност за огромни финансиски последици во претстојните судски постапки, кои би можеле да достигнат до 1,4 трилиони долари доколку компанијата ги загуби процесите.
Иако 70 отсто од Американците велат дека времето поминато на социјалните мрежи им е забавно, резултатите покажуваат дека голем дел од нив се свесни за негативните последици. Дури 52 отсто од возрасните признаваат дека самите поминуваат премногу време секојдневно на апликациите.
Американскиот Конгрес сè уште нема усвоено сеопфатен сојузен закон за заштита на децата на интернет, додека дебатата за начинот на кој треба да се регулираат дигиталните платформи продолжува.
