Американците сѐ понезадоволни од Трамп поради војната со Иран

Поддршката за американскиот претседател Доналд Трамп падна на најниско ниво во неговиот актуелен мандат, покажува најновата анкета на Ипсос за Ројтерс, според која сѐ повеќе Американци се незадоволни од растечките трошоци за живот и непопуларната војна со Иран.

Четиридневното истражување, завршено во понеделникот, покажува дека 34 отсто од Американците го одобруваат начинот на кој Трамп ја извршува функцијата, што е пад во однос на 36 проценти од претходната анкета, спроведена од 15 до 20 април.

— реклама —

Популарноста на Трамп е во постојан пад откако во јануари 2025 година повторно ја презеде функцијата, кога уживал поддршка од 47 проценти од испитаниците.

Поддршката особено опаднала по почетокот на конфликтот со Иран на 28 февруари, кога САД и Израел започнаа воени операции, што доведе до нагло зголемување на цените на горивата. Само 22 проценти од анкетираните сметаат дека администрацијата успешно се справува со трошоците за живот, наспроти 25 проценти во претходното истражување.

— реклама —

Цената на бензинот во САД порасна за повеќе од 40 проценти и достигна околу 4,18 долари за галон, што дополнително ги оптоварува американските домаќинства.

— реклама —

Анкетата покажува дека 78 проценти од републиканците и натаму го поддржуваат Трамп, но 41 процент од членовите и симпатизерите на партијата не го одобруваат начинот на кој се справува со растот на трошоците.

Кај независните гласачи, кои би можеле да бидат клучни на изборите во ноември, демократите имаат предност од 14 процентни поени пред републиканците — 34 наспроти 20 проценти, додека секој четврти независен гласач сѐ уште е неопределен.

— реклама —

Поддршката за конфликтот со Иран изнесува 34 проценти, што е пад во споредба со 36 проценти во средината на април и 38 проценти во средината на март.

Истражувањето било спроведено онлајн низ целите Соединети Американски Држави на примерок од 1.269 возрасни лица, од кои 1.014 се регистрирани гласачи, со маргина на грешка од три процентни поени.