Американската амбасадорка во Грција, Кимберли Гилфојл, лобирала кај балкански земји за купување американски течен природен гас преку грчката компанија „Актор“, објави „Волстрит журнал“ во опширна истрага.
Според весникот, на состаноците на Гилфојл редовно присуствувал лобистот на „Актор“, Христос Марафатсос, чија улога, според соговорници на весникот, не секогаш била јасно претставена. Марафатсос од клиенти поврзани со Грција добил повеќе од 440.000 долари, од кои 160.000 долари од „Актор“.
Истрагата наведува дека ваквото лобирање придонело „Актор“ да добие 20-годишен договор за набавка на американски ЛНГ во Албанија, вреден околу шест милијарди долари. Конкурентски компании тврделе дека амбасадорката ги занемарувала во корист на „Актор“. Адвокатот на Гилфојл ги отфрлил обвинувањата и навел дека нејзините состаноци биле организирани преку официјални канали и дека таа соработувала со сите енергетски компании.
Гилфојл, поранешна водителка на „Фокс њуз“ и поранешна свршеница на Доналд Трамп Јуниор, за време на мандатот во Атина активно го промовирала таканаречениот „Вертикален гасен коридор“, преку кој американскиот ЛНГ од грчките терминали би се транспортирал преку Бугарија и Романија кон Украина.
„Волстрит журнал“ објавува и наводи за нејзина изјава на вечера во Атина во март 2026 година, кога, според присутен и други извори, таа на грчкиот министер за енергетика Ставрос Папаставру му рекла: „Тоа можеме да го направиме на секоја земја. Можеме да го направиме и овде“, во контекст на претстојниот пад на романската влада. Адвокатот на Гилфојл го оспорил ваквиот опис на разговорот.
Романската влада на премиерот Илие Болојан падна на 5 мај 2026 година, откако Социјалдемократската партија се повлече од коалицијата и поддржа гласање за недоверба.
Истрагата се осврнува и на вечерата во Букурешт на 31 март, на која Гилфојл се сретнала со високи романски политичари. На средбата се разговарало за можната улога на Романија во „Вертикалниот гасен коридор“. Сепак, учесниците ги отфрлија тврдењата дека на средбата било разговарано за уривање на владата.
„Волстрит журнал“ не тврди дека САД директно ја организирале промената на романската влада. Весникот, сепак, ги поврзува активностите на Гилфојл со лобирањето за американскиот гас, договорите на „Актор“ и политичките контакти во регионот.
