Американски проценки: Расте ризикот Русија да нападне земја членка на НАТО

Американските разузнавачки служби предупредуваат дека рускиот претседател Владимир Путин во наредните години би можел да се обиде да ја тестира решителноста на НАТО преку ограничен напад врз некоја од земјите членки на Алијансата, објави „Волстрит журнал“, повикувајќи се на нови разузнавачки проценки.

— реклама —

Според извештајот, можните сценарија се движат од кибернапади и саботажи до ограничен копнен упад на источниот дел од НАТО. Американските претставници наведуваат дека претходно се сметало дека Путин нема да ризикува директен судир со Алијансата додека војната во Украина е во тек, но таа проценка се променила оваа година.

— реклама —

Како причина се наведуваат растечкиот притисок врз Кремљ поради ограничените успеси на фронтот, зголемените украински напади врз руска воена и енергетска инфраструктура, како и потребата Москва да покаже резултати.

— реклама —

Според американските проценки, доколку Русија преземе чекор против НАТО, целта би била да се создадат поделби во рамките на Алијансата. Најекстремното сценарио – ограничен копнен напад – засега се оценува како малку веројатно, но разузнавачките служби предупредуваат дека ризикот би можел да се зголемува во периодот од оваа есен до 2029 година.

Во меѓувреме, во јавноста се појави и наводно протечена руска разузнавачка проценка во која се тврди дека Москва се подготвува за долготрајна војна без прекин на огнот и без повлекување на силите. Во документот, чија автентичност не е независно потврдена, се наведува дека Русија смета дека има доволно човечки ресурси за продолжување на воените операции најмалку до февруари 2027 година и дека плановите за напади врз клучната украинска инфраструктура се веќе подготвени и чекаат политичко одобрување.