Американски проектил погодил помал товарен брод што превезувал основни намирници од Оман кон Иран, јави иранската државна телевизија ИРИБ, повикувајќи се на локалните власти.
Според гувернерот на иранскиот град Сирик, Реза Шахидијан, пловилото пловело од оманскиот град Хасаб кон Сирик кога било погодено на околу пет наутички милји од брегот на Оман.
Товарниот брод, со носивост од 150 тони, превезувал петчлен екипаж. Сите членови на посадата биле спасени со помош на други бродови што се нашле во близина и биле пренесени во Оман. Фотографии објавени од иранските медиуми покажуваат дека пловилото е делумно потонато.
Инцидентот се случил за време на втората последователна ноќ на американски воздушни напади врз Иран. Пентагон претходно соопшти дека ударите биле насочени кон радарски, комуникациски и противвоздушни системи, вклучително и повеќе локации во близина на Ормускиот Теснец.
Американскиот претседател Доналд Трамп предупреди дека нападите ќе продолжат доколку Техеран не прифати мировен договор.
Ова е нов инцидент во веќе тензичниот Омански Залив откако вчера американската војска го погоди танкерот „М/Т Сетебело“, кој превезувал иранска нафта. Во тој напад загинаа тројца индиски морнари, што официјално го потврдија и индиските власти.
Во меѓувреме, нов пожар во машинскиот оддел на друг танкер во близина на оманското пристаниште Сохар дополнително ја зголеми загриженоста за безбедноста на поморскиот сообраќај во регионот.
