Американски федерален судија го блокираше планот на администрацијата на Доналд Трамп за преселување на седиштето на Федералното истражно биро (ФБИ) во административна зграда во Вашингтон, оценувајќи дека одлуката за откажување од претходно одобрениот проект во Мериленд била незаконска.
Локацијата во Гринбелт, Мериленд, била избрана за време на администрацијата на поранешниот претседател Џо Бајден. Минатата година, функционери именувани од Трамп се обиделе да ја поништат одлуката и, наместо изградба на нов комплекс, предложиле ФБИ да се пресели во зградата „Роналд Реган“ во Вашингтон.
Судијата Теодор Д. Чуанг, кој е именуван од Барак Обама, пресудил дека таквиот потег бил незаконски. Со одлуката ѝ забранил на администрацијата да го пресели ФБИ во зградата „Реган“, да ја преуреди за потребите на агенцијата или да ги пренасочи средствата наменети за првично одобрениот проект.
Од ФБИ ја критикуваа судската одлука, оценувајќи дека станува збор за политичко мешање во работата на администрацијата. Агенцијата порача дека ќе продолжи да го следи правецот за кој смета дека најдобро ги исполнува потребите на органите за спроведување на законот.
Гувернерот на Мериленд, Вес Мур, ја поздрави одлуката и порача дека е време да се продолжи со изградбата на ново седиште на ФБИ во округот Принц Џорџ.
Сегашното седиште на ФБИ, зградата „Џ. Едгар Хувер“ на авенијата Пенсилванија, е отворено во 1975 година. Поддржувачите на преселувањето со години укажуваат дека објектот е во лоша состојба, а околу него се поставени заштитни мрежи поради делови од фасадата што паѓаат и претставуваат опасност за минувачите.
Локацијата во Мериленд беше избрана по повеќегодишна конкуренција со Вирџинија, која исто така се обидуваше да го добие проектот за новото седиште на ФБИ.
