Американски воен офицер уапсен во Велика Британија под сомнение за шпионажа во корист на Русија

Британската полиција уапси 41-годишен припадник на американската војска под сомнение дека ѝ помагал на руската разузнавачка служба. Апсењето се случило во близина на Глостер, во западниот дел на Англија, а осомничениот е задржан во полициска станица во Лондон.

— реклама —

Неговиот идентитет засега не е објавен. Тој е осомничен за кривични дела според членовите 1 и 3 од британскиот Закон за национална безбедност, кои се однесуваат на прибавување или откривање заштитени информации и помагање на странска разузнавачка служба. Полицијата потврди дека сомнежите се поврзани со Русија.

— реклама —

По апсењето реагираше директорот на ФБИ, Каш Пател, кој оцени дека станува збор за сериозен случај поврзан со сомнежи за шпионажа, важен за безбедноста на САД и нивните сојузници.

— реклама —

Се огласи и бригадниот генерал Шон Стиничон, командант на Контраразузнавачката команда на американската копнена војска. Тој порача дека наводното постапување на висок воен припадник со пристап до чувствителни информации е потсетник дека внатрешните безбедносни закани се реални и постојано присутни.

— реклама —

Британската полиција засега не открила какви информации можел да прибави или да открие осомничениот, ниту каква помош наводно ѝ давал на руската разузнавачка служба. Истрагата е во тек.