Американскиот министер за финансии Скот Бесент случајно откри дека САД разгледуваат купување јапонски јени во вредност од пет до десет милијарди долари, откако неговата белешка беше фотографирана за време на седница на кабинетот на претседателот Доналд Трамп во Кемп Дејвид.
На фотографијата на агенцијата „Ројтерс“, направена преку рамото на Бесент за време на делот од состанокот отворен за медиумите, се гледа бележник со подвлечен наслов „Да се направи“.
Под него било напишано:
„Да се купат јапонски јени од пет до десет милијарди долари.“
На листот немало други забелешки. На фотографијата се гледала и плочката со името на Бесент, поставена на конференциската маса непосредно над бележникот.
Портпаролот на американското Министерство за финансии веднаш не одговорил на прашањата на „Ројтерс“ за содржината на белешката, ниту потврдил дали Министерството веќе интервенирало на пазарот за да ја поддржи вредноста на јенот во однос на американскиот долар.
Околу два часа пред да биде направена фотографијата, „Ројтерс“ објавил дека американското Министерство за финансии известило неколку банки дека во текот на денот би можело да интервенира на девизниот пазар. Информацијата била објавена повикувајќи се на извор запознаен со ситуацијата.
Јапонските власти претходно интервенирале на пазарот во Токио за да го зајакнат јенот, по што вредноста на јапонската валута значително пораснала во текот на претпладневното тргување. Ново позначително зајакнување во однос на доларот било забележано и подоцна во текот на денот.
Американското Министерство за финансии последен пат интервенирало за поддршка на јапонскиот јен во 2011 година. Тогаш САД, заедно со другите членки на групата Г7, учествувале во координирана акција по разорниот земјотрес и цунамито што го погодија Јапонија.
