Аналитичари прогнозираат пад на цената на нафтата до крајот на годината

Светските пазари на енергенси постепено се стабилизираат, а аналитичарите очекуваат цените на нафтата дополнително да се намалат во наредните месеци поради нормализирањето на испораките преку Ормутскиот Теснец.

— реклама —

Според прогнозата на „Ситигруп“, цената на суровата нафта од типот „брент“ до крајот на годинава би можела да се движи меѓу 60 и 65 долари за барел. Во четвртокот цената на „брент“ се спушти под 71 долар, додека последен пат беше под 60 долари во јануари годинава.

— реклама —

Аналитичарите наведуваат дека основните показатели на пазарот брзо се враќаат во нормала. Бродскиот сообраќај повторно се одвива без поголеми пречки, физичкиот пазар на сурова нафта слабее, а намалувањето на залихите е помало од очекуваното.

Во меѓувреме, производителите од Блискиот Исток започнаа поагресивно да се натпреваруваат со цените. Дел од нив веќе ги намалија цените за испораките во јули и август, додека саудискиот „Арамко“ најави поголема ценовна флексибилност за азиските купувачи.

— реклама —

Слични прогнози имаат и инвестициските банки „Голдман Сакс“ и „Морган Стенли“, кои предупредуваат дека глобалниот пазар би можел да се соочи со прекумерна понуда на нафта по целосното обновување на транспортот низ Ормутскиот Теснец.

— реклама —

Според проценките, комбинацијата од зголемена понуда и послаба побарувачка би можела дополнително да изврши притисок врз цените на суровата нафта во втората половина од годината.