Директорот на Дирекцијата за заштита и спасување, Стојанче Ангелов, по силното невреме што го погоди Скопје, порача дека природата е „најголемиот контролор“ на сѐ што е изградено од човекот и дека не прави разлика меѓу никого кога ги проверува слабостите на инфраструктурата и животната средина.
Во објава на социјалните мрежи, Ангелов наведува дека природата врши „најобјективна, неселективна и сурова проверка“ дали при изградбата на објектите се почитувани законите и прописите.
„Оние градби кои не ги исполнуваат неопходните критериуми таа ги оштетува, корне или руши. Без двојни стандарди, без ургенции, без пријателски врски“, напиша Ангелов.
Тој се осврна и на состојбата со старите и нестабилни дрвја, оценувајќи дека природата не прави разлика ниту во тие случаи.
„Природата не ја интересираат ниту еколошките организации кои ги штитат дрвјата дури и тогаш кога тие се стари, нестабилни или гнили. Природата чисти сѐ по ред. Ги корне или крши слабите гранки, корне и крши цели дрвја“, наведува директорот на ДЗС.
Според него, сите што учествуваат во процесот на градење и подигање објекти треба совесно да ги почитуваат пропишаните норми, бидејќи никој не знае кога природата повторно ќе ја направи својата „контрола“.
Воедно, Ангелов упати порака и до еколошките организации.
„Претставниците на еколошките организации пожелно е да олабават со јавниот притисок кога треба да се отстрани некое убаво, но нестабилно дрво, пред тоа да падне, да искрши некој автомобил или да убие некој човек. Сејфти фрст!“, напиша Ангелов.
