Директорот на Дирекцијата за заштита и спасување (ДЗС), Стојанче Ангелов, информира дека сите три авиони „Ер трактор“ на Дирекцијата дејствуваат врз пожарот кој од страната на Македонски Брод навлегува кон ловиштето „Јасен“.
Ангелов посочи дека воздушната поддршка им помага на екипите на ловиштето „Јасен“ кои се обидуваат да го запрат огнот.
„Засега огнот не е толку низок, но доколку навлезе во боровата шума, може да ни се повтори она што ни се случи“, рече Ангелов.
Тој информираше дека активен е и пожарот на границата меѓу општините Струга и Дебар, во атарот на селото Селце. На терен дејствуваат локалните пожарникари од Струга, а дополнителни екипи ќе бидат испратени рано наутро бидејќи пожарот сè уште не е ставен под целосна контрола.
Според Ангелов, во попладневните часови биле регистрирани повеќе од 20 нови активни пожари, што претставува дополнителен ангажман за пожарникарите и останатите екипи.
Тој изрази оптимизам дека пожарот овојпат нема да навлезе во ловиштето „Јасен“, бидејќи, како што рече, на огнената линија се дејствува со сите расположливи сили.
Ангелов повторно предупреди дека следуваат уште неколку тешки денови и апелираше до граѓаните да бидат особено внимателни.
„Затоа внимавајте! Доволна е само искра за вистинска катастрофа“, порача Ангелов.
