Апасиев: Државата им простува на богатите, а го товари работникот

Државата им простува илјадници евра на најбогатите, додека работниците со минимални примања се оданочуваат во целост – оцени пратеникот и лидер на Левица, Димитар Апасиев, образложувајќи ги предложените измени на Законот за придонеси од задолжително социјално осигурување, кои денес се на дневен ред во Собранието.

Апасиев посочува дека во постојниот закон постои ограничување на т.н. максимална основица за плаќање придонеси, која изнесува 16 просечни плати, односно околу 16.500 евра. Според него, сè што се исплаќа како плата над оваа сума не се оптоварува со придонеси, што, како што вели, директно ги привилегира највисоките приходи.

— реклама —

„Сè што е над оваа граница останува неоданочено. Тоа значи дека законот им дава предност на најбогатите“, наведува Апасиев.

— реклама —

Тој го илустрира проблемот со пример, посочувајќи дека највисоката месечна плата во земјава лани достигнала околу 325.000 евра.

„На оваа сума, државата пресметува придонеси само до 16.500 евра, додека останатите повеќе од 300.000 евра не се опфатени“, наведува Апасиев.

— реклама —

Во исто време, додава тој, работниците со ниски примања немаат вакви ограничувања и нивните приходи се оданочуваат во целост.

Според лидерот на Левица, ваквата законска поставеност придонесува за продлабочување на економските разлики. „Затоа богатите стануваат побогати, а сиромашните сè посиромашни“, оценува тој.

Апасиев најави дека исходот од предложените измени ќе биде познат по гласањето во Собранието, каде ќе се одлучи дали ќе се стави крај на, како што ја нарекува, нефер практиката во системот на придонеси.