Апасиев објави отфрлена пријава за закани: „Бесилка“, „бензин и кибрит“ и „смрт“ за ОЈО биле политички говор

Пратеникот и лидер на Левица, Димитар Апасиев, објави дел од решение на Основното јавно обвинителство Скопје со кое, според него, била отфрлена кривична пријава поднесена поради серија пораки и коментари со заканувачка и навредлива содржина што ги добивал по телевизиско гостување. Случајот го спореди со неодамнешното постапување на институциите по заканите упатени кон премиерот Христијан Мицкоски.

Апасиев тврди дека пораките ги добивал од лица кои ги опишува како припадници на „радикални и екстремистички религиозни структури“. Во објавата пренесе дел од содржината што, како што вели, била предмет на пријавата.

— реклама —

„Лек за тебе е бесилка“, „За тебе само бензин и кибрит“, „Куќа ти горела, деца ти се радујеле“, „Иначе, тебе знаеме што ќе ти правиме“, „Ќе јадеш тежок ќотек по муцки“, „Смрт за ваквите“ и „Да собереме пари за погреб на Апасиев“, се дел од пораките што ги објави лидерот на Левица.

Тој наведува дека пријавата била отфрлена од обвинителката Ана Слатинец Несторовска. На официјалната страница на Основното јавно обвинителство Скопје таа е наведена меѓу јавните обвинители.

— реклама —

Апасиев објави и дел од образложението на решението, според кое коментарите биле разгледувани во контекст на неговите политички ставови и неговата положба како активен политичар, пратеник и лидер на политичка партија.

„Наоѓам дека истите претставуваат политички говор, односно може да бидат сместени во категоријата ‘политичка дебата’ во однос на која праксата на Европскиот суд за човекови права дозволува многу пошироко поставени лимити на критицизам“, стои во делот од решението што го објави Апасиев.

Според објавената содржина од решението, ОЈО оценило дека, иако коментарите биле непријатни, навредливи и претставувале агресивен напад врз политичките ставови на Апасиев, не биле исполнети условите за казнено-правно ограничување на слободата на изразување.

— реклама —

Апасиев сега го споредува ваквото постапување со случајот со заканата кон Мицкоски – „Свињо, ќе те колам на плоштад“ – по која институциите поведоа постапка.

„Па вие како лаици сами оценете и проценете, па споредете ги со навредата ‘Свињо, ќе те колам на плоштад’ и пресудете кои се порелевантни и реални за притвор“, напиша Апасиев.

Тој со вулгарна порака директно ѝ се обрати и на обвинителката која, според објавеното решение, постапувала по неговата пријава.

Објавата на Апасиев е продолжение на неговата реакција од претходниот ден, кога тврдеше дека институциите применуваат различни стандарди при постапувањето по закани кон политичари и најави дека ќе ја пронајде документацијата од својот случај за јавно да ги спореди постапките.