„ДПМНЕ и Славески им одредија џепарлак на граѓаните дури и од нивните сопствени пари во АЛТА банка“, велат од Левица

Левица преку соопштение ја критикува одлуката за ограничување на пристапот до средствата на клиентите на „Алта банка“ Битола, оценувајќи дека мерките несразмерно ги погодуваат граѓаните, особено пензионерите и семејствата кои располагаат со сопствените заштеди.

— реклама —

Од партијата посочуваат дека, и покрај уверувањата на гувернерот на Народната банка, Трајко Славески, дека банката е ликвидна и високо капитализирана, физичките лица имаат неделен лимит од 10.000 денари, експозитурите се затворени, а електронското банкарство е недостапно.

— реклама —

Левица прашува врз основа на каква процена е утврден неделниот лимит и дали при неговото определување биле земени предвид трошоците за кирија, лекување, рати и сметки. Како спорен момент го посочува и тоа што обврските на клиентите кон самата банка се изземени од ограничувањето.

Партијата бара Народната банка да објасни какви проверки биле направени при одобрувањето на преземањето на Стопанска банка Битола од страна на српската „Алта банка“ во септември 2025 година, какви информации биле разменувани со српскиот регулатор и кога биле препознаени ризиците.

— реклама —

Според Левица, мерките особено тешко ги погодуваат пензионерите и другите граѓани кои имаат сметки во банката. Од партијата сметаат дека заштитата на банкарскиот систем не треба да се спроведува преку ограничување на пристапот на граѓаните до нивните средства.

— реклама —

„Парите на граѓаните се нивна сопственост, а не инструмент за покривање на ризиците што институциите биле должни да ги контролираат“, порачуваат од Левица, барајќи одговорност и објаснување од надлежните институции.