(Видео) Апасиев на денешната собраниска седница покажа фотографии од баџанакот на Мицкоски со Заев и актуелниот премиер

Претседателот на Левица и пратеник Димитар Апасиев, во контрарепликата на одговорот на премиерот Христијан Мицкоски, презентираше фотографии од Јорданчо Јанев – Дано, баџанакот на Мицкоски, во друштво на актуелниот премиер и на поранешниот премиер Зоран Заев. Притоа, најави дека Левица располага со дополнителни документи за прашањата што ги отвори и дека во наредниот период ќе следуваат нови објави.

Осврнувајќи се на личните квалификации што Мицкоски ги упатил кон него, Апасиев го критикуваше премиерот за скапите часовници, а го потсети и на судскиот спор за клевета што го водел против него.

— реклама —

„Од сѐ што кажавте, најточно е само дека сте инфериорен. Но, треба да дополните дека сте инфериорен сноб кој носи часовници од 60.000 евра и мисли дека тоа ќе направи некоја поголема вредност“, рече Апасиев.

Тој посочи дека Мицкоски сè уште должи судски трошоци од спорот за клевета, во кој бил застапуван од актуелниот министер за внатрешни работи, Панче Тошковски. Според Апасиев, исходот од судската постапка покажал дека обидите на премиерот да го предизвика на правно поле не му оделе во прилог.

— реклама —

„Должите уште судски трошоци од тужбата што ја застапуваше Тошковски. На Апелација сега фатете некоја врска да ви ја поништи таму, инаку судски трошоци должите баш заради тоа што изгубивте спор за клевета“, истакна Апасиев.

— реклама —

Во продолжение, лидерот на Левица повторно ги отвори прашањата за деловните и политичките врски на лица од семејното опкружување на Мицкоски, презентирајќи ги фотографиите од Јорданчо Јанев – Дано со двајцата премиери.

Апасиев најави и нови документи поврзани со прашањата што ги отвори, посочувајќи дека партијата засега нема да ги објави сите материјали одеднаш.

Тој порача дека денешното излагање е само една епизода и дека во наредниот период може да се очекуваат дополнителни објави.