Во вчерашното гостување во 24 Анализа, на Телевизија 24, претседателот на Левица, Димитар Апасиев зборуваше за последната анкета спроведена од Маркет Вижн.
Апасиев ја оспори веродостојноста на анкетата укажувајќи на поврзаноста на агенцијата што ја спроведува со актуелната власт и добиените милионски тендери од државата. Според него, ваквите анкети имаат јасна цел, да ја демотивираат јавноста и да создадат перцепција за недостижност на владејачката партија. „Оваа анкета е пропаганда за демотивација на луѓето. Кредибилитетот на агенцијата е сомнителен. Еве на пример за последните локални избори на Левица и даваа 3,3%, а освоивме 7% на избори.“, истакна тој.
Апасиев оцени дека Левица е единствена партија која бележи раст, за разлика од, како што рече, „буржујските партии“ кои стагнираат или паѓаат. Во таа насока ја критикуваше и структурата на гласачкото тело кај власта оценувајќи се потпира на клиентелизам кај олигархијата, администрацијата и пензионерите. За премиерот Мицкоски рече дека е „политичар на статус-квото“ чиј „домен е од тендер до тендер“.
Говорејќи за Левица истакна дека партијата има поинаква структура и вредносен систем од останатите политички субјекти. „Менталитетот на нашето членство не е ист како на останатите партии, не примаме клиентелисти и оние коишто влегуваат во Левица не се со такви намери за разлика од останатите партии. Не секој може да биде член на Левица. Овој пат кој го оди Левица не е лесен. Кај нас членството значи и жртва. Затоа, еден наш член вреди колку десет нивни и Левица е као специјалци наспроти нивните обични партиски војници“, истакна Апасиев.
Прашан за најавите за формирање на нови партии, Апасиев одговори дека Левица ја гледа како единствена трета политичка опција. „За други партии повеќе нема простор, нема структура, се сведуваат на купи-продај. Случувањата не се некои тектонски пореметувања. Иднината на СДС е двојна. Сите со клиентелеистички менталитет ќе одат и веќе одат во ЗНАМ, сите со идеологија во Левица. Веќе на минатите избори ние имавме прелевање од членство од СДС. Иднината им е симптоматична, но што си надробиле - тоа нека си сркаат. За овие “нови ницијативи” - сѐ што бифшо-функционерско тоа е сѐ слабокрвно. Сѐ што е антиВМРО треба да се построи под бајракот на Левица. Она што е бифши министри, бифши функционери нека си прават такви движења и нови иницијативи, таквите не ги примаме.
