Апасиев со критика за работата на Пошта: Трет ден не прима писма, адвокати пропуштаат рокови

Лидерот на Левица, Димитар Апасиев, преку објава на социјалните мрежи упати остри критики кон АД „Македонска пошта“, тврдејќи дека веќе трет ден не се примаат писма, поради што, според него, адвокати пропуштаат законски рокови за жалби.

„Македонска ПОШТА веќе трет ден не прима писма! Адвокати пропуштаат рокови за жалби. Никој не им го опира“, напиша Апасиев.

— реклама —

Во продолжение од објавата, тој изнесе и други тврдења за работењето на претпријатието

„Поштата ни е дувло за овие ‘по Рамковен’. Некои од нив знаат само бројки на македонски. Букви јок! Не знам дали знаете, ама има вработени кои лежат во затвор во Италија, а тука им тече плата!? Новинарите нека испитаат“, напиша Апасиев, без да приложи докази за овие тврдења.

— реклама —

Тој ја спореди и брзината на доставата со поштенските системи од минатото.

„Одма ми е полесно на душава кога ќе прочитам дека поштата на Маите и Ацтеките во Латинска Америка во Средниот век била побрза од нашава. И ова не ми е сарказам, туку потврден факт. Еве, на пример, мене честитката од еден министер за Нова година ми стигна во април“, наведува Апасиев.

— реклама —

На крајот од објавата, тој упати и политичка порака кон премиерот Христијан Мицкоски.

„Да не го налутам премиеров Мицика. Доста му се десија гомнарии периодов. Да не го нервирам дополнително, оти ќе мора пак анкети наместени да прави за рејтингот да си го наштелува“, напиша Апасиев.

— реклама —