Апасиев за западнонилската треска: Наместо навремено прскање и чистење на жариштата, вината се префрла на вазни по гробишта

Лидерот на Левица и пратеник Димитар Апасиев со жестока реакција го критикуваше начинот на кој институциите се справуваат со западнонилската треска и со комарците во Скопје, обвинувајќи ги надлежните дека задоцниле со прскањето и дека не ги исчистиле потенцијалните жаришта.

Во објава на социјалните мрежи, Апасиев тврди дека прскањето против комарци не било спроведено навреме и дека доцнело околу еден месец.

— реклама —

Тој дополнително обвинува дека при авионското прскање се користело средство кое, според него, не било лиценцирано за таква намена, како и дека не биле расчистени каналите, барите и мочурливите површини каде што може да се размножуваат комарци.

Апасиев особено реагира на објаснувањата дека потенцијални жаришта можат да бидат и вазните со вода на гробиштата.

— реклама —

„Откај не испрскале на време за комарци у Скопје и закасниле месец дена, откај прскаат со нелиценцирано средство за авионско прскање, откај не ги исчистиле каналите, барите и мочуриштата со тиња кај што се ројат комарците – па оттаму нè убедуваат дека тие се размножувале во вазните за цвеќиња на гробиштата“, пишува Апасиев.

— реклама —

Тој ја поврзува својата критика и со актуелната епидемиолошка состојба, посочувајќи дека досега пет лица починале од западнонилска треска.

„Пет луѓе умреа за едно лето од западнонилска треска, колку што немаат умрено во изминативе 15 години“, наведува Апасиев.

Тој тврди и дека пикот на епидемијата допрва може да следува во септември и бара многу посериозна реакција од институциите.

Апасиев во објавата користи и навредлив речник кон надлежните, обвинувајќи ги за неспособност, корупција и претерана насоченост кон ПР наместо кон конкретно справување со проблемот.