Апелациониот суд Скопје ја потврди ослободителната пресуда за поранешниот премиер Никола Груевски во предметот „Талир 2“, со што е отфрлена жалбата на Основното јавно обвинителство Скопје како неоснована. Со одлуката се отвора и патот за задржување на имотот кој беше предмет на конфискација во првостепената постапка.
Апелациониот суд соопшти дека по предметот КЖ-711/26, познат во јавноста како „Талир“, по одржана нејавна седница на 26 август 2026 година, по разгледувањето на списите и земајќи го предвид предлогот на Вишото јавно обвинителство Скопје, донел пресуда со која ја одбил жалбата на ОЈО Скопје и ја потврдил пресудата на Основниот кривичен суд Скопје.
Од Апелација образложуваат дека не биле изведени докази со кои, надвор од разумно сомневање, би се докажало дека Груевски, како одговорно лице во политичката партија, постапувал спротивно на Законот за финансирање на политичките партии.
„Судот оцени дека преземените дејствија од страна на обвинетиот Н. Г. од С., како одговорно лице во правното лице, се во рамките на неговите овластувања и не се изведени докази од страна на Основното јавно обвинителство Скопје дека постапувањето на обвинетиот е спротивно на Законот за финансирање на политичките партии“, се наведува во соопштението.
Според судот, обвинителството не докажало дека ГП „Бетон“ во моментот на склучување на договорите со политичката партија имал својство на субјект кој вршел јавни услуги во смисла на законот. Оттаму, како што оценил судот, не постоела законска забрана за донирање средства од страна на компанијата кон политичката партија, ниту обврска тие средства да бидат вратени.
Со оваа одлука се задржува и партискиот имот што беше опфатен со постапката. Станува збор за имот чија вредност во јавноста беше проценувана на повеќе милиони евра, вклучително и седиштето на ВМРО-ДПМНЕ и друг имот кој со години беше замрзнат.
Случајот претходно имаше сосема поинаков тек. Во првостепената постапка Груевски беше осуден на шест години затвор, додека Кирил Божиновски доби условна казна. Судот тогаш изрече и мерка конфискација на партискиот имот.
Пресудата, сепак, не остана на сила. По измените на Кривичниот законик, предметот беше вратен во нова постапка по преквалификација на обвинението, а судењето започна од почеток.
Во меѓувреме, кривичниот прогон за Божиновски застаре, додека постапката против Груевски продолжи. Со денешната одлука на Апелациониот суд, ослободителната пресуда за поранешниот премиер е потврдена.
