Неподносливата топлина ги исцрпи залихите: Сите фабрики се затвораат
Кинеската провинција Сечуан нареди сите фабрики да се затворат на шест дена.
Ова е одлучено со цел да се ублажи недостигот од електрична енергија во регионот во моментот кога земјата ја зафати топлотен бран.
Сечуан е клучна производствена локација за индустријата за полупроводници и соларни панели, а рационализацијата ќе ги погоди фабриките што им припаѓаат на некои од најголемите светски електронски компании, објави Си-Ен-Ен.
Сечуан е исто така клучна област во Кина за литиум, клучна компонента на батериите за електричните автомобили, а исклучувањето може да ја зголеми цената на суровината, велат аналитичарите.
Кина се соочува со најлошиот топлотен бран во последните шест децении, со температури кои надминуваат 40 степени Целзиусови во многу градови.
Екстремните горештини предизвикаа зголемување на побарувачката за клима уреди во канцелариите и домовите, со што се врши притисок врз електричната мрежа.
Поради сушата водостоите на реките опаѓаат, па се намали и количината на електрична енергија што се произведува во хидроцентралите.
Покраинската влада на Сечуан, една од најголемите кинески провинции со 84 милиони жители, побара од 19 од 21 град во регионот да го прекинат производството во сите фабрики од понеделник до сабота.
Одлуката е донесена да се обезбеди доволно електрична енергија за станбена употреба.
Освен Сечуан, други големи кинески провинции, вклучително и Џиангсу, Анхуи и Жеџијанг, исто така ги повикаа бизнисите и домаќинствата да штедат електрична енергија бидејќи топлотниот бран ги исцрпи резервите на електрична енергија.
