Оправдувањата од типот „криза е“ не држат, другите земји имаат влади кои се грижат, а Македонија има мафија на власт, вели ВМРО-ДПМНЕ
Економските резултати од оваа влада се поразителни. Македонија продолжува да тоне, народот да осиромашува, стандардот стрмоглаво да паѓа, а стопаството да пропаѓа, вели ВМРО-ДПМНЕ
„Индустриското производство во месец јули е намалено за 5% во споредба со лани, која сама по себе беше една од најлошите години во економијата. Дополнително заклучно со истиот месец јули измерена е стапка на инфлација од 16%, што е двојно над просечната европска стапка, но и стапките на инфлации од сите земји во регионот. Едноставно цените во Македонија растат најзабрзано во цела Европа.
Затоа во Македонија околу половина милион жители се под прагот на сиромаштијата, а околу 35% се во ризик од сиромаштија.
Покачените цени за основните животни продукти за 50 до 100 % само ќе ги влошат состојбите.
Дополнителен проблем за целокупната економија е големиот раст на цената на електичната енергија, која нашите стопанственици ја плаќаат најскапо од целиот регион. Затоа секој ден слушаме за најави за затворање на компании, рудници и помали бизниси. Едноставно владата на Ковачевски ги остави на цедило граѓаните и компаниите а приоритет стави на криминалот и личното боатење.
Оттука заради неспособноста и криминалот на владата предводена од антимакедонската СДС Македонија во вториот квартал од 2022 година има двојно, па и тројно понизок раст на БДП од сите земји во регионот.
Оправдувањата од типот „криза е“ не држат, затоа што ова е криза за сите, исто како и ковид и енергетската криза претходно. Разликата е во тоа што другите земји имаат влади кои се грижат за своите граѓани, а Македонија има мафија на власт која го краде својот народ.
За ова профитерство, криминал и богатење на грбот на народот мора да има одговорност“, се вели во соопштението.
