„Целта на Путин е да не уништи и да нападне онаму каде што сме најслаби“, вели еврокомесарката Јохансон
Европската комисија ги повика земјите-членки на ЕУ да ги разгледаат условите под кои издаваат визи за руските граѓани.
Исто така да се отфрлат апликантите кои претставуваат безбедносна закана.
„Не треба да бидеме наивни, целта на Путин е да ја уништи ЕУ и тој би сакал да не нападне таму каде што сме најслаби“, предупреди еврокомесарката за внатрешни работи Илва Јохансон, пренесува агенцијата Франс прес.
Јохансон рече дека цивилите можат да дејствуваат како шпиони, саботери или провокатори и изјави дека некои Руси кои дошле во ЕУ „се обиделе да ги малтретираат и понижуваат украинските бегалци кои добиле заштитен статус во ЕУ“.
„Не можеме да исклучиме дека луѓето доаѓаат со цел да провоцираат, да се обидат да предизвикаат социјални немири или да предизвикаат насилство или неред или слични работи, или да се обидат да користат пропаганда“, рече таа.
