Се поврзува ли со пукањето кон Штекли: Најдено запалено возило во Сарај
По скоро една недела од пукањето во скопскиот трговски центар, возило е најдено запалено во близина на Сарај. Засега не е познато дали се поврзува со обидот за ликвидација на Раде Трајковски – Штекли и лицето кое го придружуваше. Неофицијалните информации се дека пукачот го напуштил местото каде пукаше со автомобил марка „ауди“, а дали запаленото возило е иста марка – не е познато.
Од Обвинителството и МВР без детали. Полицијата посочува дека истрагата ја води скопското Обвинителство, па таму да се бараат сите информации. Од Обвинителството – никакви новини.
Досега, по сите ликвидации, возилата со кои лицата се превезуваа беа запалени. Таков беше примерот и со лицата кои пукаа во „Шиша бар“, чие возило беше пронајдено запалено во Бутел.
Возилото со кое пукачот од минатата недела го напушти трговскиот, било без регистарски ознаки. Му се знае и делумно траекторијата на движење.
