Патното и железничкото поврзување во фокус на билатералната средба меѓу заменик претседателот на Владата, Николоски и косовскиот министер за транспорт Алиу
Заменик претседателот на Владата и министер за транспорт Александар Николоски заедно со заменик министерката за транспорт Калтрина Зеколи Шакири, денеска остварија билатерална средба со Либурн Алиу, министерот за транспорт на Косово.
Средбата се одржа во рамки на заедничката седница меѓу владите на Македонија и Косово.
Во фокусот на средбата беше квалитетно поврзување меѓу двете земји со посебен акцент на патното и железничкото поврзување.
Заменик претседателот и министер за транспорт Николоски истакна дека Македонија е влезена во силен инвестициски циклус во изградба на модерна патна и железничка мрежа, притоа потенцира дека не се отстапува од автопатско поврзување меѓу двете земји. На средбата исто така се отвори и темата за повторно воспоставување на железничкиот сообраќај и изградба на заедничка железничка станица.
„Имаме добри билатерални односи со Косово и тоа се потврдува со денешната заедничка седница меѓу двете Влади. Косово е наш сосед, економски значаен партнер и мораме заеднички да работиме на регионалниот развој и соработка. Со министерот Алиу разговаравме за заеднички проекти како би го забрзале економскиот развој на регионот и ќе придонесеме за подобра комуникација, олеснување на транспортот и создавање на подобри услови за граѓаните и компаниите“, истакна заменик претседателот на Владата и министер за транспорт Александар Николоски.
На средбата се раговараше и подобрување на условите во патниот транспорт и превозот на патници.
Министрите се согласија на интензивирање на соработката и унапредување на политиките што се однесуваат на регионалното поврзување.
