Група кочанчани, меѓу кои и лица кои се спасиле, а биле во дискотеката која одзеде 59 животи, бараат слобода за обезбедувачите. Тие и вчера беа пред судот, со порака, дека ако не биле лицата од обезбедување, тие нема да биле живи. Порачаа дека дел од обезбедувачите ги ваделе надвор, се враќале во огнот, делувале за да ги спасуваат. Со транспаренти во текот на вчерашната вечер, кога се одлучуваше за притворите, дојдоа и пред судот.
Обвинителството пак, ги третира како осомничени. Кај нив утврдува дека дозволиле во објектот да влезат малолетници, од кои три лица загинаа. Со тоа, според обвинителите, лицата направиле прекршување на законите. Според домашното законодавство, забрането е лица под 18 години да бидат пуштани во клубови и дискотеки, особено по 12 часот.
Двајца од обезбедувачите и пред медиумите кажаа дека не гледаат вина кај нив. Посочија дека спасиле над 80 животи, но дека ќе ја почитуваат одлуката на судот, доколку одлучи дека се виновни.
