Мрежата за заштита од дискриминација остро реагира на предлогот на Комисијата за прашања на изборите и именувањата до Собранието за избор на Вецко Здравески како член на Комисијата за спречување и заштита од дискриминација (КСЗД). Изборот, според нив е направен нетранспарентно, по партиски клуч, и без почитување на законски утврдените критериуми за стручност, со што директно се урива независноста и легитимитетот на ова клучно тело за човекови права.
„Седницата на Комисијата за прашања на изборите и именувањата беше закажана на нетранспарентен начин – повикот за јавна расправа беше испратен во последниот работен ден пред нејзиното одржување, што го ограничуваше учеството на јавноста и експертската заедница. За време на излагањата на кандидатите во салата во ниту еден момент немаше повеќе од 15% од вкупниот број на членови на Собранието.Кандидатот Вецко Здравевски не го исполнува критериумот - најмалку седум години работно искуство од областа на човековите права од кои пет години во областа на еднаквост и недискриминација.
Од спроведеното интервју со кандидатот, неговото претставување и одговорите на прашањата од јавноста, јасно произлегува дека тој нема релевантно знаење, ниту разбирање на клучните основи за дискриминација. Недостатокот на чувствителност и разбирање на овие теми отвора сериозни сомнежи дека тој би постапувал непристрасно и еднакво кон сите граѓани, особено кон маргинализираните заедници, кои пак, се меѓу најчестите жртви на дискриминација.
Дополнително, фактот што кандидатот бил член на Комисијата за верификација на факти (Комисија за лустрација) – тело остро критикувано од Европската унија поради злоупотреби, политички мотиви и можни прекршувања на човековите права е особено загрижувачки. Европската комисија во 2015 година препорача прекин на процесот на лустрација поради неговата идеолошка и селективна примена.
Дополнително, Здравески беше обвинет заедно со Антонијо Милошоски во случајот „Моќник“, поврзан токму со делувањето на Комисијата за лустрација. Случајот беше затворен поради застареност на делата, а не поради утврдена невиност.Таквото минато не само што не е квалификација, туку е и сериозен аргумент против неговото именување во тело чија цел е заштита на човековите права. Иако кандидатот не е носител на функција во политичка партија, од неговите изјави во јавност произлегува јасна поврзаност со политичка партија со силно влијание во Собранието.(во 2019, медиумите пренесуваат статус на кандидатот: ВМРО е судбина и иднина за Татковината,a самиот кандидат е ословен како „ветеран на ВМРО-ДПМНЕ“)”, стои во соопштението на Мрежата за заштита од дискриминација која бара Собранието да не го изгласа предложениот кандидат.
