Англиската репрезентација со загриженост го очекува полуфиналниот натпревар против Аргентина на Светското првенство, откако се појавија информации дека Џуд Белингем почувствувал болка во левото рамо по четвртфиналната победа над Норвешка.
Аргентинските медиуми објавија снимка на која се гледа како фудбалерот на Реал Мадрид, при излегувањето од стадионот во Мајами, се држи за рамото и покажува знаци на непријатност. Дополнителни сомнежи предизвика и тоа што за време на разговорот со селекторот Томас Тухел неколкупати го допирал истото рамо.
Проблемите со левото рамо не се новост за Белингем. Тој се повреди во март 2025 година на натпревар на Реал Мадрид против Рајо Ваљекано, а поради недоволно заздравената повреда минатото лето мораше да биде опериран.
И покрај тоа, Белингем игра во одлична форма на Светското првенство. На шест натпревари постигна шест гола, а со два погодоци против Норвешка беше најзаслужен за пласманот на Англија во полуфиналето.
Според информациите од англискиот табор, медицинскиот тим внимателно ја следи неговата состојба, но не се очекува повредата да го спречи да настапи против Аргентина. Доколку биде потребно, Белингем ќе игра со заштитна бандажа, како што тоа го правеше и додека настапуваше за Реал Мадрид.
Покрај Џордан Хендерсон, кој закрепнува од скршеница на раката, и Деклан Рајс, кој имаше здравствени проблеми на дуелот со Норвешка, Англија нема поголеми кадровски проблеми пред полуфиналето.
