Аргентина останува во игра за одбрана на светската титула. Актуелниот шампион по голема драма и 120 минути игра ја совлада Швајцарија со 3:1 и обезбеди место во полуфиналето на Светското првенство, каде во среда во Атланта ќе се соочи со Англија во едно од најочекуваните дербија на турнирот.
Натпреварот понуди уште еден мундијалски трилер. Аргентина поведе уште во 10. минута, кога по корнерот на Лионел Меси, Алексис Мекалистер со удар со глава ја затресе мрежата за 1:0.
Иако беа во негатива, Швајцарците беа рамноправен, а во голем дел од натпреварот и подобар противник. Нивната иницијатива беше наградена во 67. минута, кога Дан Ндоје по одлична акција погоди за заслужено израмнување на 1:1.
Клучниот момент се случи во 72. минута. По интервенција на ВАР, судијата му покажа втор жолт, односно црвен картон на Брил Емболо поради симулирање, оставајќи ја Швајцарија со играч помалку. Одлуката предизвика бурни реакции и сигурно ќе биде една од најкоментираните на шампионатот.
И покрај бројчаната предност, Аргентина не успеа да постигне победнички гол во регуларните 90 минути, па натпреварот замина во продолженија.
Херој на „гаучосите“ беше Хулијан Алварез, кој во 112. минута постигна спектакуларен погодок од далечина и ја врати предноста на Аргентина. Во последните секунди, во 121. минута, Лаутаро Мартинез ја потврди победата, погодувајќи за конечни 3:1.
Со овој триумф Аргентина се пласира во полуфиналето, каде ќе ја очекува пресметка со Англија, додека Швајцарија, и покрај одличната игра, го заврши настапот на Мундијалот.
