Властите на Аргентина пресретнале авион со повеќе од 400 килограми кокаин, со помош на Американската администрација за борба против дрога (DEA), соопшти аргентинската министерка за безбедност Алехандра Монтеолива.
Според нејзините зборови, авионот кој превезувал 442 килограми кокаин бил пресретнат на полиња кај местото Парахе, на северот на провинцијата Вера.
Уапсени се пилотот и копилотот, двајцата државјани на Боливија, како и уште шест лица поврзани со операцијата за шверц на дрога, пренесува „Ла Насион“.
Како што навеле извори од аргентинската Федерална полиција, припадници на Одделот за борба против наркотици го пресретнале авионот „Цесна 210“ на ранчот Дон Хулио.
Аргентинските власти заплениле и два пикапа, два товарни камиони, опрема за сателитска комуникација и резервоари за гориво.
Како што се наведува, акцијата претставувала кулминација на истрага започната во март, врз основа на информации доставени од Американската администрација за борба против дрога.
